JOSETXO IMAZ DORRONSORO

ORDIZIAKO MENDIZALE TALDEAK JOXE IMAZ DORRONSORO MENDIZALE BETERANOARI OMENALDI XUMEA ESKAINI NAHI DIO LERRO HAUEN BITARTEZ.

 

 

80 urte bete dituzu Joxetxo, beti bezain gazte, beti bezain arin.

  Ataundarra zara jatorriz eta Ordiziarra adopzioz, bizitza ia osoa Ordizian eman da gero Ordiziar petoa honez gero.

 Mendia da zure zaletasun maitatuena, oraindik orain dotore igotzen dituzu aldaparik zailenak, pauso arina duzu eta apaltasuna da zure ezaugarririk nabarmenena, hitz gutxiko gizona zara baina traba handirik ez duzu zure umore sotilarekin talde osoa tentatuz algaraka jartzeko.

 Adinean aurrera goazenontzat eredu zara, zer esanik ez atzetik datozen gazteentzat, baina batez ere zure gizatasuna da gu guztiontzat eredu, alor askotan erakusten diguzun gizatasuna. Zure motxila barruan urte osoan gordetzen eta erakusten diguzu Eguberritako jaien usaina, atsedenaldi bakoitzean taldeari indar berritzeko turroi zatiak banatuz. Zenbaitetan mendi altuenetan batez ere, ardo tragoxka egiteko ardo botila ere garraiatzen duzu, garaipenaren lekuko.

 Josetxo, mendia eta mendiari diogun maitasuna ez litzateke berdina izango zu gabe. Udaberria heltzen denean zenbat kuku kanta entzun dugun elkarrekin!!! okilak zuhaitz zaharretan habiak egiten ditueneko kolpe hotsek ere eten izan du gure pausajea izadiaren festaz gozatu ahal izateko, hala egin dugu urte luzeetan, izadian, basoan barrena eta harkaitzetan ere berarekin bat garela sentituz.

 Gaur mendizaletasuna kirola eta lehia bihurtu dira zentzu handi batean, baina, aurreko belaunaldientzat mendia, lehia baino gehiago izan da, bizi-bide gehienetan, gu gehienon jatorria baserrian dagoelako, baina mendi  gailurrak  geologiaren interpretazioaz gain, zerutik, unibertso zabaletik, izarretatik gertuago sentitzeko gune sakratuak izan dira antzina antzinatik. San Juan bezperako tradizioa gogora ekar genezake hori egiaztatzeko, Nafarroako mendi gailurretara joaten ziren gure aurreko artzainak “eguzkiaren dantza” ikustera urteko egunik luzeenean, hala utzi zuen idatzita(Joxe Mari Satrustegik) unibertsoa interpretatu eta gurtzeko beste molde batzuk zituzten. Guk galdu ditugu ohitura zahar horiek baina ez ordea udaberriaren hosto berritze usaina, edo udazkeneko orbel hotsa hanka azpitan sentitzeko eta bizitzeko ahalmena, hori guztia natura bizi dugunontzat bene benetan eskertzen dugun opari eder bat da. Zentzumenentzat izadia da gure erreferentzia eta gizatasunarentzat zu bezalako mendi lagunak. Jarraitu horrela urte luzeetan Josetxo eta atzetik goazenok suerte piska batekin ikus dezagula. Besarkada handi bat adiskide eta urte askotarako bihotz bihotzez.  

 

Ordiziako Mendizale taldea